Deklaratë nga Ambasada e Sh.B.A. (20 Nentor 2009)

Ambasada e Shteteve të Bashkuara mbështet plotësisht të drejtën për lirinë e shprehjes dhe tubimit për të gjithë njerëzit.  Një shprehje e tillë duhet të jetë paqësore dhe të mos cënojë të drejtat e të tjerëve.  I bëjmë thirrje të gjithë shqipëtarëve, si ata që marrin pjesë në protesta edhe ata që kanë përgjegjësi të ruajnë rendin, të ushtrojnë të drejtat dhe përgjegjësitë e tyre me qetësi dhe respekt.

Studentët e Universitetit të Tiranës në Video Konferencë me Studentët e Universitetit të Georgia Southern

Profesoresha Fulbrightiste Lori Amy, ishte forca shtytëse për realizimin e dy video konferencave ndërmjet studentëve të shëndetit public në Universitetin e Tiranës dhe studentëve të antropologjisë dhe shëndetit public të universitetit Georgia Southern në datat 10 dhe 11 nëntor.   Të dy diskutimet virtual trajtuan respektivisht çështje e prioritete të jetës në tranzicion dhe të shëndetit global. Të shqetësuar veçanërisht në lidhje me zhvillimin e infrastrukturës së shëndetit public dhe gatishmërinë e emergjencës, pjesëmarrësit e diskutimit për Shëndetin Global planifikojnë të organizojnë edhe videokonferenca të tjera si pjesë e planifkimit strategjik për projekte dhe kurrikulën e Shëndetit Publik. Video konferencat u mundësuan me ndihmesën teknike të Z. Nikolin Kola, pronar i një kompanie internet në vend, dhe Profesor Ilirian Malollarin, Dekanin e Fakultetit të Shkencave të Natyrës që e mikpritën këtë aktivitet në shtëpinë e tyre. 

Deklaratë e Ambasadorit të Sh.B.A. Withers për Shtypin (13 Nentor 2009)

Pozicioni ynë [lidhur me bojkotin parlamentar] është, në fakt, që më e mira do të ishte nëse do të kishte dialog midis aktorëve politikë kryesorë për të arritur një lloj kompromisi që do t’i jepte fund këtij ngërçi.  Mendoj se të gjithë ndjejmë që mosprania e opozitës në parlament nuk është në të mirën e vendit si i tërë.  Do të donim të shihnim një zgjidhje të kësaj, por mendoj se është me rëndësi jetësore [që të kuptohet] që kjo është diçka që duhet ta zgjidhë udhëheqja politike shqiptare.  Shpresojmë që do të mund ta zgjidhin mes tyre dhe që gjërat të kthehen në rrugën që duhet të jenë.

Fjala e Ambasadorit të Sh.B.A. Xhon L. Uidhers
Konferenca “Midis Lirisë së Dhunuar dhe Informalitetit” (6 Nentor 2009)

Zonja dhe Zotërinj, kolegë diplomatë, anëtarë të shtypit dhe pjesmarrës,

Kam dashur prej kohësh që t’u drejtohem anëtarëve të Unionit të Gazetarëve dhe për mua është një privilegj dhe nder që të flas sot së bashku me Z. Çipa. 

Fatkeqësisht, takimi ynë i parë ndodh nën hijen e një ngjarjeje tragjike të papranueshme.  Një nga kolegët tanë, një nga anëtarët e bashkësisë së gazetarëve shqiptarë dhe një nga miqtë e mi, Z. Mero Baze, u sulmua në mënyrë të paprovokuar dhe të pafalshme disa netë më parë.  Autorët e pretenduar të këtij sulmi janë njerëz të njohur për të gjithë ne, për të gjithë ju, njerëz, në dukje, të parë si me nivel e gjykim të shëndoshë, derisa ky incident provoi të kundërtën. (fjala e plote)

Deklaratë e Presidentit Barak Obama mbi Iranin (4 Nëntor, 2009)

Si sot tridhjetë vjet më parë, Ambasada Amerikane në Teheran u pushtua.  444 ditët që nisën në 4 nëntor 1979 ndikuan thellë jetët e amerikanëve të pafajshëm që u mbajtën peng në mënyrë të padrejtë, dhe ne iu detyrohemi atyre amerikanëve dhe familjeve të tyre mirënjohjen tonë për shërbimin dhe sakrificën e tyre të jashtëzakonshme.

Kjo ngjarje i futi Shtetet e Bashkuara të Amerikës dhe Iranin në një rrugë dyshimi, mosbesimi dhe përplasjesh. E kam bërë të qartë që Shtetet e Bashkuara të Amerikës duan ta kapërcejnë atë të kaluar dhe kërkojnë që të kenë me Republikën Islamike të Iranit një marrëdhënie të bazuar në interesat dhe respektin e përbashkët.  Ne nuk ndërhyjmë në punët e brendshme të Iranit.  Ne i kemi dënuar aktet terroriste kundër Iranit.  Ne e kemi njohur të drejtën ndërkombëtare të Iranit si një fuqi paqësore nukleare.  Ne kemi treguar gatishmërinë tonë për të ndërmarrë hapa të sigurtë, së bashku me anëtarët e tjerë të bashkësisë ndërkombëtare.  Ne kemi pranuar një propozim nga Agjensia Ndërkombëtare e Energjisë Atomike për të përmbushur kërkesën e Iranit për ndihmë për nevojat mjekësore për qytetarët e tij.  Ne e kemi bërë të qartë që nëse Irani përmbush detyrimet që çdo komb ka, do të ketë një rrugë për një marrëdhënie më të frytshme dhe të suksesshme me bashkësinë ndërkombëtare.

Irani duhet të zgjedhë. Kemi dëgjuar për tridhjetë vite se çfarë kundërshton qeveria iraniane; pyetja, tani, është se çfarë lloj të ardhmeje përkrah ajo. Populli amerikan ka respekt të madh për popullin e Iranit dhe historinë e tij të pasur. Bota vazhdon të jetë dëshmitare e thirrjeve të tyre të fuqishme për drejtësi dhe kërkimin e guximshëm të tyre për të drejtat universal. Është koha që qeveria e Iranit të vendosë nëse do që të përqendrohet tek e kaluara, apo nëse do të bëjë ato zgjedhje që i hapin derën shanseve, begatisë, dhe drejtësisë më të madhe për popullin e tij.

Deklaratë nga Ambasada e Sh.B.A. (3 Nëntor 2009)

Ambasada e Shteteve të Bashkuara u skandalizua nga sulmi ndaj gazetarit Mero Baze më 2 nëntor. Sulmet fizike ndaj gazetarëve dhe forma të tjera të kanosjes së medias errësojnë lirinë e shtypit. Të gjitha format e presionit dhe kanosjes ndaj medias janë të papranueshme. 

Ambasada mbështet dënimin nga ana e Qeverisë së Shqipërisë të këtij akti dhe përkrah thirrjen e Kryeministrit që autoritetet përkatëse të kryejnë një hetim të plotë dhe të shpejtë të këtij incidenti dhe që ata që janë përgjegjës të japin llogari. Ambasada do të vazhdojë të mbështesë me forcë lirinë e shtypit në Shqipëri. 

Ambasada Amerikane Organizon Konkursin e Artit për Studentët e rinj me temë – “Respekti dhe Shumëllojshmëria nëpërmjet Artit”

Tiranë: Ambasada Amerikane në Tiranë do të organizoje një konkurs mbarëkombëtar, me titullin “Respekti dhe Shumëllojshmëria nëpërmjet Artit” nga data 1 Nëntor deri më 15 Dhjetor. Të rinjtë nga mosha 10 deri 18 vjeç janë të mirëpritur të sjellin piktura origjinale pa kornizë, me temën e respektit dhe larmishmërisë. Ky konkurs arti feston bashkëpunimin e diversitetit,  ndërbesimit, dhe atë ndërkulturor. Tradita e gjatë e Shqipërisë në lidhje me tolerancën dhe respektin për diversitetin janë temat që duhet të pasqyrohen në punimet artistike që do të dorëzohen.
Të interesuarit mund t’i dorëzojnë punimet e tyre pranë hyrjes së Ambasadës Amerikane deri në orën 17:00, të datës 15 Dhjetor. (njoftimi i plote)

Per me shume informacion vizitoni faqen tone te aktiviteteve per vitin 2009